எதிர்பார்ப்புகள்

உன் தலைகோத விரல் தேடும் மனதுக்குள் காதல் 

உன் விலகாத வலியெல்லாம் பிறர்க்குத் திணித்தென்ன மோதல் 

உன் சுகம் மட்டும் தானா சார்ந்தோரின் வாழ்க்கை 

ஏன் எண்ணத்தில் வாராதோ தெளிவான வேட்கை 

மனதோடு பேசு, அயராமல் ஓடு 

கனிவான நெஞ்சோடு வையத்தில் நடைபோடு 

உன் இன்பம் - சில தேவைகள் 

உன் துன்பம் - பேராசைகள் 

உன் வாழ்க்கை - சில தேடல்கள் 

உன் போக்கு - எதிர்பார்ப்புகள் 

எதிர்பார்ப்பு - அதை போக்கு 

உன் இல்லம் - உன் சொர்க்கம் 

உன் கோபம் -  உன் நரகம் 

எதிர்பார்ப்பு - அதை போக்கு

உன் வேலை - பூஞ்சோலை 

உன் பாதை - நீரோடை 

உன் வாழ்வின் புதிர்க்கெல்லாம் விடை நீ மட்டும் அறிவாய் 

உன் சோர்வின் நிலைக்கெல்லாம் வழி நீயாகவே உணர்வாய் 

அச்சங்கள் கொள்ளாமல் பிறர்மீதும் திணிக்காமல் நிறைவோடு போராடுவாய்

உன் வரவு - சில உறவுகள் 

உன் அச்சம் - சில பிரிவுகள் 

உன் நோக்கம் - சில வெற்றிகள் 

உன் தேவை - சில தனிமைகள் 

உன் வாழ்க்கை - உன் எண்ணம் 

உன் எல்லை - உன் வானம்!

ரசித்து சுவாசிக்கிறேன்

பூவிதழ் பார்வையில்

மந்திர மொழியில்

ரீங்கார அழுகையில்

பனிக்கும் புன்னகையில்

நீ வெல்கிறாய்

நான் உறைகிறேன்

நாளும் தவழும் பொழுதிலும்

தத்தி நடக்கும் பொழுதிலும்

எனைத் தழுவும் பொழுதிலும்

மார்பில் உறங்கும் பொழுதிலும்

நீ உணர வைக்கிறாய்

நான் உலராமல் வாழ்கிறேன்

நீ பூத்த நன்னாளாம்

என் திமிருடைந்தத் திருநாளே

நமது ஒவ்வொரு நொடியிலும்

வழிநடத்தி நீ முன் செல்கிறாய்

அமைதியாய் உன் பின் செல்கிறேன்

நீ வேறுலகம் காட்டுகிறாய்

நானதில் ரசித்து சுவாசிக்கிறேன்

பூங்கொத்து

இனிய உறவே

புதிய வரவே 

உனைக் காணவே

கண்கள் பனிக்குதிங்கே 

காத்திராமல் தாழ்திறந்து

பூத்திராயோ பூந்தளிரே 

என் சுண்டு விரலின் நுணியை

உன் பிஞ்சுக் கையுள் பற்றி 

புன்னகைப்பாயோ உறக்கத்தில்

என் மூச்சுக் காற்றின் வெப்பத்தில்

சஹானா ராகத்தில் அழுதிடாயோ

உனது தேன் குரலில்

உன் நித்திரையை நித்தம் கண்டு
ரசித்திடுவேன் பக்கம் வந்து

நீ மிதித்தாலும் இன்னும் கொஞ்சம்

என் நெஞ்சம் தான் உந்தன் தஞ்சம் 

மயிலுக்குத் தோகை சுமையா 

கடலுக்கு மீன்கள் சுமையா 

பூவுக்குத் தேன் தான் சுமையா 

பாட்டுக்கு இசை தான் சுமையா 

இனிமேல் என் எஞ்சிய காலம் 

நிச்சயம் உன் வசந்த காலம் 

சுகமான சுமைகள் தருவாய் 

பரிவோடு பாசம் தருவேன் 

எப்பொழுதும் சேட்டை புரிவாய் 

எண்ணோடு எழுத்தும் தருவேன் 

உன்னுடைய கனவுகள் வாழ 

என்னுடைய உயிரும் தருவேன்.

விருப்பப்பட்டியல்

வருட இறுதி 
கால நியதி 

புதிய வருடம் 
பரந்த உலகம் 

என்றும் வழங்கும் 
வாழ்க்கை கழகம் 

புத்தம்புது  காலை
பூஞ்சோலை 

நிறைந்த வேளை
நிலையான வேலை 

வேண்டும் வேண்டும் 

கொஞ்சம் வெற்றி 
கொஞ்சம் தோல்வி 

புதிய வேள்வி 
புதிய கேள்வி 

தேடலில் வியர்வை 
ஆற்றலில் பொய்கை 

வேண்டும் வேண்டும் 

சின்ன வலிகள் 

மாய காயம் 

சொச்ச அசதி 

மெத்த பக்தி 

கூர் புத்தி 

நெழிவு சுளிவு 

தெரிந்த பணிவு 

தெளிந்த மனது 

வேண்டும் வேண்டும் 

உள்ளம் உருகும் 

இனிய இசையும்
பாரதி பாட்டும் 

மாற்றம் இல்லா 

அன்னை அன்பும்
தந்தை நெறியும் 

சதியின் நட்பும்
காதல் இதயம் 

வேண்டும் வேண்டும் 

பிள்ளை பேறும் தங்கும் இல்லம் 

வேண்டும் வேண்டும் 

கனிந்த உள்ளம் 

கொண்ட இறைவன் சித்தம் 

இவை நடக்க வேண்டும் 

வேதம் வேண்டும்
நாதம் வேண்டும் 

கவிதை வேண்டும்
எழுத நேரம் வேண்டும் 

இயங்க வேண்டும்
இயக்க வேண்டும் 

அள்ள அள்ள வாழ்வில் 

அன்பு வேண்டும்.

இல்லாள்

மெல்ல மெல்ல பக்கம் வந்து

குட்டி குட்டி கண்கள் கொண்டு

திறந்து மூடி நெஞ்சைக் கொய்து

சிறையில் வைக்கிறாய்.

பூத்திராத சின்ன மொட்டு

இதழில் நீரைக் கொஞ்சம் வைத்து

உறங்கும் போதும் உலவும் போதும்

விருந்து வைக்கிறாய்.

பதறி விரைந்து சமைக்கும் நேரம் - உன்

கலைந்த ஓரக் கூந்தல் ஈரம் - என்

இதயத் துடிப்பை நிறுத்திச் செல்லும்.

நீ அமைதியாக உறங்கும் நேரம்

அதிகாலை சற்றே விழித்த நேரம்

உன் ஈரக் கூந்தல் உலரும் நேரம்

என் எண்ண ஓட்டம் மின்னல் வேகம்..

கொஞ்சிப் பேசி கெஞ்சும் போதும்

மழலை சிரிப்பில் மயக்கும் போதும்

அக்கு வேராய் ஆணி வேராய்

என்னைக் கொல்கிறாய்!!

மோட்ச வாசல்

மனதோடு மனது
கலக்கின்ற பொழுது
மயக்கங்கள் தருகின்றது.

இதயத்தின் வலிகள்
உன் இதழ் பொழியும் அன்பில்
இதமாகத் தணிகின்றது.

உனை மார்போடு தழுவத் துடிக்கின்ற கரங்கள் -
நாணத்தை விடுத்து புதுத்தேடல் கொள்ளும்
கண் பேசும் பரிபாஷை முடிகின்ற இரவில் -
கண் தவிர மற்றவை தான் விளையாடிடும்.



காமத்தின் முடிவில்
என் நெஞ்சோடு நீ உறங்கும்
தருணங்கள் சுகமானது.

மோட்சத்தின் வாசல்
சேர்கின்ற பொழுது
நம் கண்கள் மழை பொழியுது !!

பேரின்பம்

சிந்திடும் வியர்வைத் துளி - உனக்கு
நம்பிக்கை வளர்த்திடும் பள்ளி - வாழ்க்கை
உழைக்க உழைக்க கொள்ளை அழகடா!

இதை எண்ணிய வேளையில் நீயும்
கதை கட்டிடும் வேலையை விட்டு
சதை தேய்ந்திட மேம்பட உழைப்பாயடா!

தூற்றுவோர் தூற்றலில் என்றும்
சாக்கடை நாற்றமே மிஞ்சும்
இதை கருத்திலே என்றுமே எண்ணிக் கொள்ளடா!

உழைப்பிலே கண்ணியம் கொண்டு
காதலாய் தொழிலையும் கண்டு
வாழ்ந்திடும் வாழ்க்கையில் உண்டு பேரின்பமடா!!

குருநிலை

இயற்கை இவ்வுலகில் சொல்லும் விஷயங்கள்
நாளும் நம்வாழ்வில் கற்கும் பாடங்கள்
வாழ்கை மலர்மஞ்சம் மூடன் பக்கத்தில்
நாளும் புதுஅனுபவம் ஏகன் பக்கத்தில்



கல்லுக்குள் மறைந்திருக்கும் சிற்பங்கள் யாவும்
வலி தாங்கி உருமாறி புகழ்மாலை சூடும்
கொதிக்கின்ற ரத்தத்தின் வெப்பத்தில் விதியும்
எதிர்நோக்கி அடிவைக்க நம்பக்கம் வளையும்
அடிவாங்கி வலிதாங்கும் உலகின்பொருள் யாவும்
மின்னாமல் வெல்லாமல் கனவிலும் நிகழ்ந்திடுமோ?

வீரத்திருமகனே!
நீ தோல்விக்கு அஞ்சாமல்
உன் வேள்வியை முடிக்காதே
நீ வேதனை தாங்காமல்
இங்கு சாதனை கிடையாதே!!

நெஞ்சமெல்லாம்..

வற்றாத வார்த்தை இருந்தும் பற்றாதே என் சுவட்டில்

கல்லாத பாடம் ஒன்று நெஞ்சோடு மனக்கூட்டில்

எவ்வாறு நானும் முயல உன்னை புரிய வைக்க

காட்டாற்று வெள்ளத்தில் உயிர் சிக்கி பரிதவிக்க

துடிக்கும் இதயம் மறந்தேன் - திமிரிழன்தேன்.

இதயம் இரண்டும் மொழியும் பொழுது உயிர்கள் கலக்கும்

இதை வார்த்தையால் பரிமாற நினைக்க தேகம் வெடிக்கும்

உயிரோவியம் என் மனதுக்குள்ளே பலகாவியம் படைக்கும்

வெறும் கூற்றினால் வெளியில் சொன்னால் புனிதம் கெடுக்கும்

வழி காட்டி நீ வலி தருகிறாய்

புள்ளி கோலமாய் இணைகிறாய்!!

பூஜா

உன் நினைவில் நனைந்திடவே
பிடிக்கிறதே பனித்துளியே
துளித்துளியாய் தேன்துளியாய்
கலந்திடுவாய் ஜீவனிலே

பார்த்தால் நீ பனித்துளியோ
பழக்கத்திலோ தேன்துளியோ
புன்னகையோ பௌர்ணமியோ
நம் காதல் வளர்பிறையோ!!

தாலாட்டும் குரலில் மயிலிறகாய் வருடும்
உன் அழைப்பைத் தேடும் தொலைபேசி கருவி
உறங்காமல் உளறும் உறக்கத்திலோ சிரிக்கும்
கனவோடும் வருவாய் கற்பனையும் பிறக்கும்



நெஞ்சில் சிறு வலியோடு கண்ணின் இமை மூடாது
அலைந்தேனே சிலகாலம்
கண்ணில் புது பொலிவோடு வந்தாய் நீ தேவதையே
இனிமேல் நம் பொற்காலம்



உன் மடியில் உறங்கிடவே
துடிக்கிறதே இரு விழியே
உன் அணைப்பில் வாழ்ந்திடவே
காத்திருப்பேன் கண்மணியே!!